ދެއްވަދޫ ރަސްގެފާނުފަދަ ސިޔާސީ މުޙަންނިކުންނާއި، ދީދިބެއްޔާ ފަދަ ޢާލިމުންނާއި، ދެއްވަދޫ ދައްނަ އާދަންސައީދު ފަދަަ ބޭފުޅުން މިހާރުވެސް، އަދި މުސްތަޤުބަލުގައި ވެސް ދެއްވަދޫގެ ބިމުން އުފަންވާނެ ކަމާމެދަކު ޝައްކެއް ނެތެވެ. ދެއްވަދޫ މީހުނަށް ނިސްބަތްކުރެވޭ ވާހަކަތަކަކީ، ހުވަދުއަތޮޅުގެ ފޯކްލޯރުން ބަޔެކެވެ. އެރަށު މީހުން ނުކުރާ ކިތަންމެ ކަމެއް ވެސް އެމީހުނަށް ނިސްބަތްކޮށްގެން މުނިފޫހިފިލުވުމުގެ ގޮތުން ކިޔާފައި ވެ އެވެ.
މިގޮތުން ދެއްވަދޫ މީހުންނާބެހޭ ގޮތުން ނުވަތަ އެމީހުނަށް ނިސްބަތްކޮށްގެން ދައްކާ އުޅޭބައެއް ވާހަކަތަކުގެ ތެރޭގައި ދެއްވަދޫ މީހުން މިސްކިތް ގިބުލައަށް އެނބުރި ވާހަކައާއި، މިސްކިތުން ބާލިދީ ހިފައިގެންގޮސް އަނދިރި ހިއްކި ވާހަކައާއި، ދެއްވަދޫ ރައްޔިތުން ހަނދު ރުނބާއަކަށް ލައިގެން ދެއްވަދޫ ރަސްގެފާނަށް ވެދުން ކުރިވާހަކައާއި މިހެންގޮސް އެތަކެއް އެތަކެއް ދޮގު ވާހަކަތައް އޭރު ހުވަދު އަތޮޅުގެ މީހުން ދެއްވަދޫ މީހުއްނޭ ކޮޔާގެން ވަނީ ދައްކާފައެވެ. މިހާރުވެސް ދެއްވަދޫގެ ރައްޔިތުއްނަކީ ހުވަދޫ އަތޮޅުގައި އޮތް އެއްމެ އެކުލުންތެރި ރައްޔިތުންތަކެއް ތިބި އެއްރަށޭވެސް ބުނެވިދާނެވެ. މީހުން ދައްކާ މިބާވަތުގެ ދޮގު ވާހަކަތަކުން މުސްތަގުބަލުގައިވެސް ދެއްވަދޫގެ ރައްޔިތުންގެ އަޒުމަކަށް އެއްވެސް އަސަރެއް ނުކުރާނެއެވެެ.
No comments:
Post a Comment